 |
| First issue of the quarterly folio |
KON itande sa ubang pundok sa mga magsusulat, ang Cagayan de Oro Writers Bloc matawag nga usa ka puya. Ug tungod kay puya pa, nagkinahanglan kini sa pag-amuma ug pag-atiman sa mga alagad sa dagang nga nag-una sa duyan. Dinhing bahina, mapasalamaton ang CDO Writers Bloc sa suporta ni Prof. Ricardo M. de Ungria sa UP Mindanao sa iyang paggiya aron mahimugso kini nga kapungongan sa mga alagad sa mamugnaong panulat.
Oo, puya pa ang CDO Writers Bloc—nahimugso kini niadtong Hunyo 24, 2010. Apan bisan sa iyang pagkapuya, ang CDO Writers Bloc naningkamot nga makahimo sa pagtikang aron makaabot sa girumbong padulngan sa unahan.
Human sa pagkahimugso sa CDO Writers Bloc, gihimo dayon ang katigoman ug nahukman sa kapunongan ang paglusad og mga kalihokan aron mabatyagan sa katilingban ang iyang presensya. Ug usa sa nakab-ot nga hukom mao ang pagpahigayon og sharing and critiquing sa mga obra sa mga sakop, ug ang pagdapit og senior writer aron maoy motimon sa diskusyon.
Ug sa bugnaw nga gabii sa Agosto 14, didto sa balkon sa buhatan sa CU Press, gihimo ang unang workshop, uban ni Palanca awardee Lina Sagaral-Reyes. Atol sa maong workshop, nagbinayloay sa mga panahom ang matag sakop samtang nagtuki sa mga sugilanon ug balak. Tinamdan ang establisadong mga giya bahin sa kritisismo, hapsay ug tulin ang pagtuki sa giduso nga mga obra. Ug human sa maukitong paghukngay, nag-iyahay ang mga tagsulat sa pag-rebisar sa ilang gipulawang mga mugna sa ilang handurawan.
GINAINGON nga ang balak anha nato hipalgi sa mga di-kasagarang talan-awon, kanang makapakurat sa atong pagbati ug makapatindog sa atong balahibo. Ug ang kasagarang mga butang lagmit labyan lang sa atong mga mata, dili makadani sa atong pagbati. Apan kon ato gyong hinuktokan pag-ayo, ang tawo nabuhi taliwala sa mga butang kasagaran—tulog ug damgo, paghuwat sa gipaabot, pagkaon, gutom, sud-an, kasakit, pangayam. Mga butang nga yano ug gibuhat sa tawo matag adlaw.
Aniay paghisgot sa pipila ka balak nga nahisukip niini nga basahon. Sa Gai kog Itik Parts ni Jayson Parba, atong makita ang seryosong hangyo sa persona ngadto sa iyang higala nga adunay binuhi nga mga itik. Ug dili tambok ug dili sab niwang nga itik ang iyang gipangayo. Maoy iyang gipangayo ang itik nga saktog lawas, kay ang saktong lawas, seksi ug bigot man tan-awon. Matikdi kini nga linya: “Kanang sakto lang og lawas/Para maigo sa akong kalha./Akong adobohon. Sa kalipay,/ako iyang busogon.”
May panultihon sa Tinagalog nga ‘libre ang mangarap.’ Kay diha man gud sa damgo, walay makapugong sa imong gusto. Sa Kalatsutsi ug Klorox ni Ton Daposala, atong mabati ang kagiki sa katawa sa persona ug sa iyang kadula, diin iyang nasimhot ang alimyon sa Kalatsutsi nga sa kataposang estropa nahanaw ug napulihan ‘og baho sa laway ug klorox.’
Kining tagsulat mitampo usab sa iyang balak nga Kugan. Ang maong balak naglatid sa kasinatian sa persona nga dili gayod makapugong sa pagkalot, hinungdan nga ang nuka nga hapit na unta maalim, magdugo pagbalik ug mahimong presko na usab ang samad-nuka.
Ang mga tema nga gituki sa mga Ka-Bloc mga yano lamang. Apan tungod sa kamamugnaon sa mga sakop sa CDO Writers Bloc, ang maong kasagaran nga mga hitabo mahimong timgas ug tulokibon.
ANIA sulod sa mga pahina niini nga newsletter ang kompletong version sa maong mga balak ug sugilanon. Kini gituyo pagpunpon aron makasimhot sa tinta sa patikanan ang maong mga obra ug aron adunay mapakli nga mga panid ang mga tawo nga nagsunod sa kalihokan sa CDO Writers Bloc.
Dinhi niining unang edisyon sa atong newsletter, atong malantaw ang kiay sa itik, masimhot ang alimyon sa Kalatsutsi, mabati ang pagmahay sa tawo nga gi-indiyan sa iyang gikasabot, madungog ang dalugdog sa iyagak sa baboy ihalas nga gitaopan sa bangkaw, masinati ang kahapdos sa nuka nga gibuliburan sa pinisilin human na-ak-ak ang kugan ug ang langgam nga nawani sa panon kay nalinga sa talan-awon nga iyang gisud-ong.
Sa kataposan, tukason ko ang akong kalo ug moingon: Salamat, Salamat sa CU Press sa pagpatik niini nga newsletter ug sa layout artist sa paghatag og kinabuhi sa mga obra diha sa mga pahina.
Palihog padayon sa pagbasa!
RAUL G. MOLDEZ
Issue Editor
The Quarterly Folio of the CDO Writers Bloc
September 11, 2010
Featured works:
Walang komento:
Mag-post ng isang Komento