Nga katol-katol ang palibot sa nuka
nga hapit nang maalim, nasinati ko
dihang nagpulsiras pag nuka
ang akong mga tiil. Mga nuka
nga bungas kinawtan tungod
sa dapaw ug abog nga mibagtik
kay matulog lang nga way panghimasa,
sa mga pangos tungod sa pagkadam-ag
sa batoong dalan, o’ pagkasaghid sa lansang.
Bisan buliboran sa piniig nga Penicillin,
dugay gihapong manga-alim. Labi na kadtong
mga nuka sa tikod. Kanunay man god
pistahan sa mga langaw ug lagong.
Ganahan kong magkalot-kalot sa kugan.
Gilok-gilok. Dayon hinay-hinayon ko pag-ak-ak.
Magsugod ko sa daplin. Dayon
huwap-huwapon. Ang kalanto sa naugang
nana namilit sa akong mga tudlo.
Apan ang katol-katol nga kugan kanunay
mangablit sa akong mga tudlo.
Buot magpahikap. Gustong magpakalot.
Hinungdan nga usahay, hingpit kong
malimtan ang baod ni Papa: Dong, ayaw
pugsa. Kay magdugo kon imong pugson.
-RAUL G. MOLDEZ
Walang komento:
Mag-post ng isang Komento